ដើម្បីកុំឲ្យអ្នកអត្ថបទនេះ ខាតពេលខ្ញុំចង់បញ្ជាក់ទុកជាមុន!
**អត្ថបទនេះ មិនមែនសម្រាប់អ្នកលក់អនឡាញតិចតូចទេ បើសិនជាអ្នកលក់ដូរផលិតផល ១ មុខ ២ មុខ ខ្នាតតូច មិនបាច់ឈឺក្បាលជាមួយរឿងទាំងអស់នេះទេ ផលិតបានខ្លួនឯង ឬទិញចូល លក់ចេញ ចំណេញយកលុយហៅប៉ាជាការស្រេច (តែក៏អាចរៀនសូត្របន្ថែមដែរ ប្រសិនបើចង់ពង្រីកការធ្វើទីផ្សារនៅថ្ងៃក្រោយ) ។
អត្ថបទនេះ សម្រាប់ម្ចាស់អាជីវកម្មដែលចង់ពង្រីកការធ្វើទីផ្សារតាមបណ្តាញសង្គម ឲ្យបានទូលាយ ដោយសារ បណ្តាញសង្គម បច្ចុប្បន្ននេះ ក្លាយជាផ្សារត្រីទៅហើយ អ្នកលក់រញ៉ៃរញ៉ៃ លក់យូរទៅ អ្នកលក់ច្រើនជាងអ្នកទិញ ។
ដើម្បីឈានមួយជំហាន ទៅមុខគេ ឲ្យលេចធ្លោជាងគេបន្តិច ម្ចាស់អាជីវកម្ម មិនគួរផុសលក់អត់សម្រាកទេ គួរតែមានគម្លាតពេលវេលាណាមួយ ដកឃ្លាមកផលិតមាតិកា ១ ប្រភេទនេះ ដែលខ្ញុំហៅថា “Infotainment Content Marketing” ។
អ្វីជា Infotainment Content? ហេតុអ្វីម្ចាស់អាជីវកម្មសម័យឌីជីថលគួរតែផលិតមាតិកាបែបនេះ?
Infotainment ជាពាក្យកាត់មកពីពាក្យពេញថា Information + Entertainment ដែលមានន័យថា ជាមាតិកាចំណេះដឹងឬព័ត៌មានបែបកម្សាន្ត ដែលធ្វើឲ្យមនុស្សមានអារម្មណ៍ថា ពេញចិត្តជាមួយមាតិការបស់អ្នក (ជាពិសេសវីដេអូ) ។ មិនតែប៉ុណ្ណោះ សម្រាប់អ្នកផលិតមាតិកា ក៏មានអារម្មណ៍ថា ធូរស្រាល មិនបាច់និយាយបែបផ្លូវការ ដូចអ្នករាយការណ៍ព័ត៌មានតាមទូរទស្សន៍នោះទេ អ្នកអាចនិយាយលេងសើច និយាយបែបធម្មជាតិ ប្រើពាក្យធម្មតា ដែលរាស្ត្រសាមញ្ញអាចយល់បាន ។
ធម្មតា តែមិនធម្មតា ដោយសារមាតិកាបែបនេះ មានអត្ថប្រយោជន៍ធំ ២ ៖
- ងាយស្រួលទាញចំណាប់អារម្មណ៍ជាងមាតិកាដែលនិយាយតែពីចំណេះដឹងសុទ្ធសាធ ព្រោះថា មនុស្សត្រូវការកម្សាន្ត និងការចេះដឹង ស្របជាមួយគ្នា (អញ្ចឹងហើយបានជាអ្នកពេញចិត្តនឹងមើលវីដេអូក្នុង YouTube ជាងមើលវីដេអូក្នុងវេបសាយមេរៀនអនឡាញ)
- មាតិកាបែបនេះ នឹងបង្វែរអារម្មណ៍អាជីវកម្មអ្នក ពីការលក់ដូរសុទ្ធ (គិតតែពីចង់បានលុយគេ) ទៅជាការភ្ជាប់ទំនាក់ទំនងជាមួយមនុស្សថ្មីៗលើបណ្តាញសង្គម
Case Study:
ដូចដែលអ្នកធ្លាប់ស្គាល់ Think E-Marketing អញ្ចឹង ខ្ញុំក៏មានវគ្គសិក្សាអនឡាញមួយលក់ឲ្យអតិថិជនខ្ញុំដែរ ទាក់ទងនឹង “ការប៊ូសផុសលើហ្វេសប៊ុក តីកតុក រួមជាមួយការផលិតមាតិកាដើម្បីធ្វើទីផ្សារ” ។
តែយ៉ាងណា ខ្ញុំមិនផុសលក់វគ្គសិក្សានេះជាប្រចាំទេ ដោយ ៨០% នៃមាតិកាដែលខ្ញុំផុស ភាគច្រើនទាក់ទងនឹងចំណេះដឹងទូទៅ និងព័ត៌មានមានប្រយោជន៍ផ្សេងៗទៀត ។
វីដេអូមួយ ដែលខ្ញុំផលិតថ្មីៗនិយាយពី មុខងារ End-to-End Encryption នៅក្នុង Messenger ជាវីដេអូដែលខ្ញុំចែករំលែកចំណេះដឹងទូទៅពីបច្ចេកវិទ្យាថ្មីៗលើបណ្តាញសង្គម ដែលមានទស្សនាប្រមាណ ៥០ ម៉ឺនដង ឬប្រហែលនឹង 1M Play និងអ្នកចែករំលែកបន្តច្រើនជាង ៥ពាន់នាក់ ។
ខ្ញុំដឹងថា មនុស្សជាច្រើនមិនយល់ពី End-to-End Encryption ស្អីហ្នឹងទេ ហើយក៏គេមិនខ្វល់ពីមុខងារអីហ្នឹងដែរ (ខ្ញុំតេស្តហើយ ផុសវីដេអូដដែល បែបចំណេះដឹងសុទ្ធ អត់មានការកម្សាន្ត អ្នកទស្សនាបានតែ ៧០០ ដងប៉ុណ្ណោះ) ។
អញ្ចឹងហើយ ខ្ញុំក៏ដូរប្រធានបទទៅជាបែប Infotaiment ដោយប្រើការទាក់ទាញបែបនេះ (Hook) ៖
“មុខងារលាក់ការសម្ងាត់នៅក្នុង Messenger ទោះបីសង្សារមានអាខោនក៏មិនដឹងថាយើងឆាតពីអ្វីដែរ” ។
គ្រាន់តែដូរប្រធានបទប៉ុណ្ណឹង លទ្ធផលខុសគ្នាដូចមេឃនឹងដី ដែលវីដេអូមួយនេះ រកអ្នក Follow Page ខ្ញុំបន្ថែមបាន 6K Followers ដោយអត់ចំណាយលុយប៊ូស ។
អ្វីដែលខ្ញុំចង់ប្រាប់អ្នកទាំងអស់គ្នា ការផលិតមាតិកាបែប Infotaiment នេះ មិនទាញការលក់ឲ្យអ្នកទាំងអស់គ្នាទេ តែវាទាញចំណាប់អារម្មណ៍យ៉ាងស្រួល ដែលនៅក្នុងចំណោមអ្នកទស្សនាមាតិកា ឬវីដេអូរបស់អ្នក មានទាំងមនុស្សទូទៅ មានទាំងអតិថិជនគោលដៅ ។
មនុស្សទូទៅទស្សនាវីដេអូអ្នក -> គេស្គាល់អ្នក គេ Follow បណ្តាញសង្គមរបស់អ្នក ។
អតិថិជនគោលដៅទស្សនាវីដេអូអ្នក -> គេស្គាល់អាជីវកម្ម គេស្គាល់ផលិត កសាងទំនុកចិត្តបន្តិចម្តង ងាយស្រួលលក់ដូរនៅថ្ងៃក្រោយ ។
ជាថ្មីម្តងទៀត កុំគិតតែលក់ពេក ព្រោះចូលចិត្តផឹកកាហ្វេរាល់ថ្ងៃ ពេលខ្លះក៏គេចង់ដូរអារម្មណ៍ផឹកតែដែរ ។
ស្រួលយល់អត់?
3 in 1 “MASTER SOCIAL MEDIA MARKETING”
៣ ជំនាញក្នុងវគ្គសិក្សាតែមួយ ៖ ផលិតមាតិកា ប៊ូសផុសលើហ្វេសប៊ុក និង តីកតុក
