៤-៥ ឆ្នាំមុន គ្រាន់តែចេះ Boost Post មួយមុខ ដាក់លុយ ១ ថ្ងៃ $5 លក់យកទៅណាអស់ ព្រោះមានតែមនុស្សប្រមាណ ០.០០០១ ប៉ុណ្ណោះ ដែលចេះ Boost Post ខណៈដែលអ្នកលក់អនឡាញមានតិច អ្នកទីផ្សារអនឡាញ ក៏មិនសូវខ្វល់ ព្រោះគិតថា វាមិនចាំបាច់ ។

តែ ២ ឆ្នាំចុងក្រោយនេះ ម្ចាស់អាជីវកម្ម និងអាជីវកម្មជាច្រើន កំពុងប្រកួតប្រជែងគ្នាខ្លាំងលើជ្រុងថ្មីមួយទៀត គឺការផលិតមាតិកាទាញចំណាប់អារម្មណ៍ ។

តែ… ២០២៦ ខាងមុខនេះ ការផលិតមាតិកាមិនមែនគ្រាន់តែទាញចំណាប់អារម្មណ៍ប៉ុណ្ណោះទេ តែមានរឿងថ្មីមួយទៀតគឺ ការប្រកួតប្រជែងគ្នាលើ Personal Branding ។

ឆ្លងការតាមបទពិសោធន៍ Admin ផ្ទាល់តាំងពីឆ្នាំ ២០១៨មក!

> នេះជាថេរវេលាសង្ខេបៗពីការវិវត្តិ Social Media Marketing នៅកម្ពុជា

អញ្ចឹងនេះជាជំនាញ ៣ ដែលម្ចាស់អាជីវកម្មគួរចេះសម្រាប់ត្រៀមប្រកួតក្នុងទីផ្សារអនឡាញ ២០២៦ ៖

១/ បច្ចេកទេស Boost នៅលើ Facebook & TikTok គួរតែចេះដដែល តែមិនបាច់ស្មុគស្មាញច្រើនដូចមុនទេ ដោយគ្រាន់សិក្សាលើរបៀបប្រើឲ្យត្រូវតាមបច្ចេកទេសជៀសវាងមានបញ្ហា និងដឹងរបៀបធ្វើតេស្តរកពាណិជ្ជកម្មដែលដំណើរការល្អ រុញការលក់

២/ តិចនិកផលិតមាតិកា បែប Content Marketing ធ្វើយ៉ាងណាឲ្យចំណេញទៅដល់ការធ្វើទីផ្សារ និងការលក់ ជាពិសេសគឺចេះធ្វើតេស្តរកមាតិកាដែលឈ្នះ

៣/ Personal Branding សម្រាប់ឆ្នាំ ២០២៦ > នេះជាចំណុចដែលយើងត្រូវនិយាយគ្នាឲ្យច្បាស់នៅថ្ងៃនេះ!

សូមមេត្តាឈប់យល់ច្រឡំថា View ច្រើន = Personal Branding ។

View ច្រើន មានន័យថា គេមើលឃើញវីដេអូអ្នកច្រើន គេឃើញមុខអ្នកច្រើន តែមិនប្រាកដថានេះជា Personal Branding ទេ ព្រោះថា គ្រាន់តែគេអូស News Feed ហើយចុចមើលវីដេអូអ្នក ១ វិនាទី ក៏គេរាប់ថា 1 View ដែរ ។

View = ចំនួនអ្នកឃើញ អ្នកទស្សនា

Brand = កេរ្តិ៍ឈ្មោះ > ពេលគេឃើញមុខអ្នក គេដឹងថា អ្នកជាអ្នកណា អ្នកជាអ្នកជំនាញ ធ្វើការងារអ្វី លក់អ្វី គេចង់ប្រឹក្សាយោបល់ជាមួយអ្នកជាដើម!

រៀនជំនាញក្នុងការកសាង Personal Branding រៀងពិបាកបន្តិច ដោយសារ Personal Branding ត្រូវការមានលក្ខណៈសម្បត្តិ ៣ ចំណុច ។

1/ Niche Area

តើគេស្គាល់អ្នកជាអ្នកណាឲ្យប្រាកដ? 

ឧទាហរណ៍ ៖ ចែម្ចាស់ប្រេន ក ដែលចូលចែករង្វាន់លើហ្វេសប៊ុក, ពូអ្នកលក់ស្ករទាញ ដែលល្បីខាងរាំដាក់តីកតុក, អគ្គនាយកក្រុមហ៊ុន ខ ដែលចូលចិត្តចែករំលែកបទពិសោធន៍ជីវិតដល់ក្មេងៗ, Admin អ្នកផលិតមាតិកាដែលនិយាយពីជំនាញឌីជីថលថ្មីៗ ។

2/ Value Proposition

តើគុណតម្លៃរបស់អ្នកនៅកន្លែងណា?

ឧទាហរណ៍ ៖ ក្នុងចំណោមមនុស្ស ១០ នាក់ដែលនិយាយប្រធានបទដូចគ្នា ធ្វើ Personal Branding ដូចគ្នា តែគេចាប់អារម្មណ៍អ្នកត្រង់ថា អ្នកតែងតែនិយាយប្រធានបទទាំងអស់ ជាមួយនឹងតួលេខច្បាស់ៗ ។

3/ Social Proof

ក្រៅពីអ្នកនិយាយពីខ្លួនឯង តើមានអ្នកផ្សេងនិយាយពីអ្នកឬអត់?

នេះជាចំណុចមួយដែលពិបាក កម្រមានអ្នកធ្វើបានណាស់ ដែល Personal Branding របស់អ្នក ឡើងដល់ចំណុចកំពូលដូច Influencer ដែលមានអ្នកផ្សេង លើកឈ្មោះរបស់អ្នកមកនិយាយលើបណ្តាញសង្គម ។

💡Tips: Consistent > ការដែលបង្ហាញមុខទៀងទាត់ ចេញមុខជាប្រចាំ ក៏ជាកត្តាមួយជួយជម្រុញ Personal Branding ដែរ ព្រោះថា ពេលខ្លះអ្នកអត់មាន ៣ ចំណុចខាងលើមែន តែអ្នកចេញមុខនិយាយប្រធានបទចម្រុះលើបណ្តាញសង្គម យូរៗទៅ គេក៏ចំណាំមុខអ្នកទុក ស្គាល់ថាអ្នកជាអ្នកណា ។

ជំនាញទី ៣ នេះ​ វាកើតចេញពីជំនាញទី ២ ដែលទាមទារការអនុវត្តន៍ និងចំណាយពេលយូរដល់រាប់ឆ្នាំក៏មានដែរ មិនមែនធ្វើតែ ១ ខែ ២ ខែបានផលទេ ព្រោះបណ្តាញសង្គមស្រុកខ្មែរ វាមមាញញឹកជាងផ្សារត្រីទៀត ១ ថ្ងៃផ្ទុះ ៣ រឿងក៏មានដែរ អញ្ចឹងហើយមនុស្សឆាប់ភ្លេចមុខអ្នកបន្តិច ។

គ្រប់ជំនាញទាំងអស់នេះ យើងនឹងមានវគ្គសិក្សាថ្មីសម្រាប់ឆ្នាំ ២០២៦ ខាងមុខនេះ ។